Kandidati për deputet i opozitës, Gjin Gjoni, deklaroi në emisionin “Off the Record” me Andrea Dangllin se, kur aleanca AMSH të marrë drejtimin e vendit, do të ribëjë reformën në drejtësi me partnerë ndërkombëtarë të tjerë, pasi ajo është realizuar nga Soros.
Gjoni theksoi se reforma në drejtësi nuk është realizuar nga PS, por nga 140 deputetët dhe se pasojat që po përjetojmë tani janë rezultat i ligjeve të kaluara më vonë. Sipas tij, PD do të punojë me institucionet ndërkombëtare për të rivendosur drejtësinë dhe për të krijuar një drejtësi të pavarur. Ai shtoi se reforma do të bëhet pas ndryshimeve kushtetuese dhe se drejtësia aktuale është e kapur, me mijëra dosje të bllokuara.
Në lidhje me fushatën elektorale, Gjoni vuri theksin te programi i qartë i opozitës, duke shtuar se Rama ka dështuar në qeverisje dhe se gjysma e ministrave të tij janë të akuzuar për korrupsion.
