Gjatë një takimi me emigrantët shqiptarë në Milano, kryeministri Edi Rama ka reaguar ndaj kritikave për përfshirjen e disa zyrtarëve të Partisë Socialiste në procese penale. Ai pranoi se ka pasur ministra dhe kryetarë bashkish që janë përballur me drejtësinë, por theksoi se kjo është rezultat i sistemit që vetë mazhoranca ka ngritur.
“Po, i keni dëgjuar këta që thonë: ‘Si guxojnë të kërkojnë votën kur e kanë gjysmën e qeverisë në burg?’ Por e vërteta është krejt ndryshe. Ne kemi pasur mbi 60 ministra dhe qindra kryetarë bashkie e komune. Nëse disa prej tyre janë gjetur me probleme me drejtësinë që ne e krijuam me vullnetin tonë të lirë, nuk do të thotë që të ulim kokën. Përkundrazi, duhet të jemi më krenarë se asnjëherë tjetër,” tha Rama.
Ai theksoi se opozita nuk ka pasur asnjëherë vullnet për të ndërtuar një drejtësi të pavarur, duke e akuzuar për pengesa sistematike dhe përpjekje për të mbajtur kontroll mbi sistemin.
“Këta janë këneta që nuk e kanë lënë drejtësinë të flasë kurrë. Janë ata që kanë marrë edhe jetë njerëzish të pafajshëm. Sot duan të kthehen sërish, sepse bufi kërkon të rikthejë Shqipërinë në gropën e tij, vetëm për hallin e tij personal,” deklaroi kryeministri.
Në vijim të fjalimit, Rama u shpreh se më 12 maj, opozita do të dalë humbëse dhe ironizoi kundërshtarët politikë duke thënë: “Vetëm ne mund ta mbrojmë drejtësinë nga ofensiva e bufit dhe mushkonjave që përbetohen se do ta shkrijnë SPAK-un. Në 12 maj ata thjesht dhe vetëm do të prezantohen me Noc Rrokun.”
Ai i bëri thirrje shqiptarëve që të mos ndikohen nga ndasitë partiake, por të bashkohen në mbështetje të Partisë Socialiste për ta çuar Shqipërinë drejt anëtarësimit në Bashkimin Europian.
Në fund të fjalës, Rama u surprizua nga legjenda e Juventusit, Alessio Tacchinardi, i cili i dhuroi një fanellë me numrin 5, duke i uruar fat si tifoz i zjarrtë i klubit italian.
