Ish-kryeministri Sali Berisha, para dy vitesh në daljet për media deklaronte se për zgjedhjet e 2025, në rast të fitores së PD-së “do të ketë një garë të dytë brenda kësaj force për emrin e kryeministrit”.
Por me gjasë kjo ishte retorika e radhës e Berishës, pasi siç nuk ka ndërmend të lëshojë karrigëen e PD, nuk pritet t’ia lëshojë radhën as ndonjë kandidati tjetër nga radhët e demokratëve për kryeministër.
Të paktën këtë e bëri të qartë një nga besnikët e tij në parti, Belind Këlliçi, i cili në takimin e sotëm në degën numër 9, shpalli se pas zgjedhjeve kryeministër do të jetë Sali Berisha.
“Bashkë me zotin Berisha, që do të jetë kryeministri jonë, i të gjithë shqiptarëve pas datës 11, e kemi premtuar në njësinë numër 8” – tha ndër të tjera Këlliçi.
Me gjasë edhe gara për emrin e kryeministrit do ketë fatin e primareve të PD, të cilat para se të bëheshin Berisha shprehej se do ishin përcaktuese për kandidatët për deputetë. Pasi u bënë, ndërroi mendje dhe tha se rezultatet nuk janë përcaktuese dhe se lista përfundimtare e kandidatëve do përcaktohet në kryesi.
Problemi qëndron në faktin: Do e mbajë njeri fjalën në këtë parti?!
