Në një reagim të ashpër, Partia e Lirisë ka denoncuar si “përpjekje kriminale” dënimin disiplinor të liderit të saj, Ilir Meta, i cili u ndëshkua me 10 ditë ndalim aktivitetesh brenda ambienteve të paraburgimit, pasi zhvilloi një intervistë. Sipas njoftimit të forcës opozitare, ky dënim është një tjetër akt represioni që tregon, sipas saj, fytyrën e vërtetë të “Narkoregjimit”.
Sipas nënkryetarit Tedi Blushi, ngjarjet e 11 majit, që kulmuan me arrestimin e Ilir Metës, kanë vërtetuar se zgjedhjet lokale janë zhvilluar nën standarde mafioze dhe tërësisht kriminale. Ai e cilëson arrestimin e Metës si një “rrëmbim terrorist” dhe një akt të paramenduar politik, që sipas tij, u konkretizua më pas në Vorë, ku bandat – siç thotë Blushi – morën peng qendrat e votimit.
Në qendër të akuzave qëndron edhe Task Forca e ngritur nga SPAK për parandalimin e krimeve zgjedhore, të cilën Partia e Lirisë e cilëson si një strukturë tërësisht të ndërtuar për të goditur opozitën dhe për të mbuluar “masakrën elektorale” të 11 majit. Për Blushin, ky nuk është më një institucion i drejtësisë, por një instrument i kontrolluar politikisht nga kryeministri Edi Rama dhe i drejtuar nga prokurori Altin Dumani.
“Në vend që të arrestonin banditët që kërcënonin opozitën para syve të kamerave ditën e zgjedhjeve, SPAK dhe Dumani zgjodhën të vijojnë izolimin ekstrem të Ilir Metës, pa asnjë provë ligjore, në shkelje të çdo norme kushtetuese dhe ndërkombëtare,” – thuhet në deklaratën e Partisë së Lirisë.
Sipas Blushit, zgjatja e hetimeve për Metën është një manovër mafioze e urdhëruar që në vitin 2022 nga vetë Rama, në një deklaratë të bërë në Asamblenë e Partisë Socialiste. Ndaj, siç njofton zyrtarisht forca politike, masa e arrestit do të ankimohet në Gjykatën Kushtetuese, me synim që çështja të shkojë në Gjykatën Evropiane të të Drejtave të Njeriut në Strasburg.
Por kulmi, sipas Partisë së Lirisë, ka ardhur këto ditë me vendimin e Komisionit Disiplinor të IEVP “Jordan Misja”, i cili ndëshkoi Metën me 10 ditë ndalim të aktiviteteve sportive, vetëm për faktin se foli me një gazetare. Një masë që Blushi e cilëson jo vetëm qesharake, por edhe represive, që synon ta mbyllë liderin opozitar në heshtje të plotë, pa të drejtë komunikimi me opinionin publik.
“Edhe në kushtet e izolimit të padrejtë, Ilir Meta vazhdon të drejtojë me vendosmëri dhe efikasitet Partinë e Lirisë, duke garantuar të gjithë gazetarët e pavarur se nuk do të ketë forcë që t’i ndalë të drejtën për të komunikuar,” – thuhet në deklaratë.
Partia e Lirisë e cilëson arrestimin e Metës si një strategji të pastër politike për të trafikuar mandate dhe për të shuar opozitarizmin në vend, ndërsa paralajmëron se shumë shpejt “ky rrëmbim do të marrë përgjigjen e merituar ligjore”.
