Kreu i Partisë Demokratike, Sali Berisha, ka lëshuar akuza të forta ndaj kryeministrit Edi Rama në lidhje me procesin e përzgjedhjes së drejtorit të ri të Byrosë Kombëtare të Hetimit (BKH). Gjatë një konference për mediat, Berisha deklaroi se emërimi është i parapërcaktuar dhe se vendimi i fundit do të merret personalisht nga kryeministri.
“Të lobojë kush të dojë, ai do emërohet nga Edi Rama. Aty janë futur disa emra për të dalë ndonjë Çako apo si Çako”, u shpreh Berisha, duke iu referuar ish-drejtorit të Policisë së Shtetit, Haki Çako.
Kryedemokrati ironizoi gjithashtu edhe një tjetër ish-drejtor të Policisë, Ardi Veliun, për të cilin tha se nuk ka garuar për postin, pasi ka qenë “kandidat rezervë”.
Akuzat për BKH erdhën në një kontekst më të gjerë kritikash ndaj qeverisë. Berisha ngriti pretendime serioze për presion dhe kërcënime ndaj vëzhguesve ndërkombëtarë të zgjedhjeve, duke përmendur me emër kryeministrin Edi Rama dhe ministrin për Evropën dhe Punët e Jashtme, Igli Hasani.
“Janë kërcënuar egërsisht vëzhguesit ndërkombëtarë. Vetë Rama dhe ministri i tij Igli Hasani. Në Shqipëri thotë jam shqiptar, në Greqi thotë jam grek. Këta nuk janë për asnjë komb”, tha Berisha.
Ndërkohë, ai e cilësoi si akt politik dhe kriminal zgjatjen e hetimeve me gjashtë muaj ndaj presidentit të Partisë së Lirisë, Ilir Meta. Sipas tij, vendimi është marrë me urdhër të drejtpërdrejtë të Ramës dhe përbën një shkelje të rëndë të të drejtave të njeriut.
“Meta u mbajt në burg si person nën hetim, pa asnjë provë. Dosja është dorëzuar në gjykatë dhe megjithatë kërkohet shtyrja e hetimeve për gjashtë muaj të tjerë. Kjo është diktaturë në formën e saj më të shëmtuar, është narkodiktaturë”, u shpreh Berisha.
Ai përfundoi deklaratën duke e akuzuar kryeministrin Rama për urrejtje personale dhe politike ndaj kundërshtarëve, duke sjellë edhe referenca historike me tone të forta akuzuese ndaj familjes së tij.
