Ish-kryeministri dhe kryetari i Partisë Demokratike, Sali Berisha, ka dalë këtë të martë nga ambientet e Prokurorisë së Posaçme kundër Korrupsionit dhe Krimit të Organizuar (SPAK), pas një seance që zgjati rreth një orë. Në një deklaratë për mediat, Berisha bëri të ditur se është njoftuar për një padi për shpifje të ngritur ndaj tij nga gjyqtarja Irena Gjoka, e cila është përfshirë në shqyrtimin e çështjes së tij në Gjykatë.
Berisha akuzoi Gjokën se ka vepruar nën ndikimin politik të kryeministrit Edi Rama dhe zyrtarit të lartë të drejtësisë Altin Troplini. “Irena Gjoka, një person që e ka vendin në burg, e nxitur nga Rama dhe Altin Troplini, ngre padi për fyerje ndaj meje,” u shpreh ai.
Sipas Berishës, shkak i padisë janë pyetjet që ai i ka drejtuar publikisht gjyqtares Gjoka lidhur me një bisedë të supozuar me ish-deputetin socialist Alket Hyseni për një shumë prej 500 mijë eurosh. “E pyeta publikisht nëse ka pasur një bisedë me Alket Hysenin për 500 mijë euro për të ndikuar në klasifikimin e një grupi si jo-kriminal, apo nëse ka lidhje me Mirel Mërtirin. Këtë e ka marrë si fyerje,” deklaroi Berisha.
Ish-kryeministri akuzoi më tej gjyqtaren për lidhje familjare dhe miqësi të afërt me bashkëshorten e kryeministrit, Linda Rama, duke pretenduar se kjo përbën konflikt interesi në trajtimin e çështjes së tij.
“Kjo është një përpjekje për të më penguar në ushtrimin e funksionit tim si kryetar i opozitës. Pyetjet e mia ishin legjitime dhe nëse ajo do të ishte e pafajshme, do t’i kishte mohuar ose sqaruar,” u shpreh Berisha, duke e cilësuar gjyqtaren si “mashtruese ordinere” dhe “delinkuente klasike”.
Sali Berisha: SPAK ishte i shqetësuar se përse unë paskam fyer sipas tyre, Irena Gjokën. U pyeta nëse unë kam bisedë me Alket Hysenin, apo video, ku ai ka dhuruar 500 mijë euro. E kam pyetur Irena Gjokën nëse ka folur me Alket Hysenin për 500 mijë euro. Këtë e mori si fyerje. Këta janë llum njerëzor. Para dy javësh i japin avoketërve të mi vendimin e shkarkimit të Irena Gjokës. Pas dy javësh, gënjejnë deputetët, duke shkruar se KLD nuk ka vendimmarrje më 1996.
KLGJ gënjeu, tha se s’ka vendim të KLD më 1996 për shkarkim të Irena Gjokës. Vetëm sa nuk i thonë ‘virgjëresha e drejtësisë’, në kuptimin moral. Mediat e Ramës shpikin lajm nga policia se nuk është i vërtetë lajmi për Irena Gjokën. Më 2024, Prokuroria thotë se po nis hetim të thelluar dhe më pas përgjigja është se nuk kemi çfarë të hetojmë. Irena ka 5 mbiemra, është dënuar dy herë në Greqi.
