Kryebashkiaku i Tiranës, Erion Veliaj, do të paraqitet sot në orën 14:00 para Gjykatës së Apelit të Posaçëm, me kërkesën për të zëvendësuar masën e sigurisë “arrest me burg”. Seanca do të zhvillohet nën drejtimin e gjyqtarit Engert Pëllumbi.
Avokatët mbrojtës të Veliajt kanë kërkuar një masë më të butë sigurie, duke pretenduar se nuk ekzistojnë më rrethanat ligjore që justifikojnë qëndrimin e tij në burg. Sipas tyre, hetimet e SPAK nuk paraqesin prova të reja që të mbështesin nevojën për paraburgim.
Veliaj ndodhet në burgun e Durrësit prej 10 shkurtit, pas arrestimit me urdhër të SPAK, i akuzuar për korrupsion pasiv në nëntë episode dhe pastrim parash. Deri më tani, përpjekjet e tij për t’u liruar nga qelia kanë hasur në refuzim nga gjykatat.
Seanca e sotme vjen pas ankimit të bërë ndaj vendimit të 23 prillit, kur gjyqtari Erion Bani vendosi të mbajë në fuqi arrestin me burg, duke u mbështetur në raportin e përditësuar të SPAK mbi ecurinë e hetimeve. Në atë kohë, gjykata argumentoi se ekzistonin ende dyshime të arsyeshme për përfshirjen e Veliajt në veprimtari kriminale dhe rreziku i ndikimit në hetim mbetej i lartë.
Ndërkohë, një rekurs i veçantë është dorëzuar edhe në Gjykatën e Lartë, ku pritet shqyrtimi i masës së sigurisë. Ende nuk është caktuar data e seancës apo trupa gjykuese që do të marrë në dorë shqyrtimin e këtij rekursi.
Veliaj ka mohuar në mënyrë të përsëritur akuzat ndaj tij, duke i cilësuar ato si të motivuara politikisht. Megjithatë, SPAK ka deklaruar se hetimet po zgjerohen edhe në lidhje me persona të tjerë të përfshirë në rastin që ka tronditur administratën lokale të kryeqytetit.
