Të hënën në orën 14.00 kryebashkiaku Erion Veliaj pritet të dalë përpara Gjykatës së Apelit të Posaçëm bashkë me biznesmenin Elman Abule.
Objekti i kërkesës "Ankim ndaj vendimit nr. 219 akti, datë 23.04.2025, të Gjykatës së Posaçme të Shkallës së Parë për Korrupsionin dhe Krimin e Organizuar, me objekt: Informacion 2 mujor për zbatimin e masës së sigurimit “arrest në burg”, për personin nën hetim Erion Veliaj dhe për zbatimin e masës së sigurimit "arrest në shtëpi" për personin nën hetim Elman Abule, lidhur me hetimet paraprake për procedimin penal Nr. 27, të vitit 2024, të Prokurorisë së Posaçme kundër Korrupsionit dhe Krimit të Organizuar".
Pra Apeli i Posaçëm do të vlerësojë veprimet e kryera nga SPAK për personin nën hetim gjatë dy muajve të parë që është mbajtur në paraburgim njeherazi do të shqyrtojë edhe kërkesën për zbutje të masës.
Veliaj mbahet në paraburgim që prej 10 shkurtit 2025 nën dyshimet për korrupsion e pastrim parash. Ai po hetohet në të njëjtën dosje me bashkëshorten Ajola Xoxa dhe gjashtë biznesmenë, të cilët janë me masa arrest në shtëpi dhe detyrim për paraqitje.
