Disa ditë pas debateve për shndërrimin e burgut të Spaçit në një vend xhirimi për filmin e Visar Zhitit dhe Namik Ajazit, ka reaguar Ministri i Kulturës dhe Inovacionit. Kampioni i 20 mijë votave të Tiranës, Blendi Gonxhja, në një reagim në Facebook, ka sulmuar ata që, sipas tij, guxuan “të përdorin këtë situatë për instrumentalizim politik apo për të nxitur dyshime dhe ndasi.”
Sipas zotit Gonxhja, “vështirësitë e realizimit të këtij projekti filmik janë të mëdha, për shkak të pamundësisë për të rindërtuar kampin-burg në një set, gjendjes tejet të amortizuar të sitit në Spaç, nevojës për xhirime autentike në një ambient që ruan ende gjurmët reale të tragjedisë së atij vendi.”
Pra, ministri i qeverisë Rama e pranon se në burgun e Spaçit është ndërhyrë për të siguruar xhirimet për filmin e Zhitit dhe Ajazit. Por ai nuk merr përsipër të sqarojë pse duhen lyer me gëlqere dhe pse duhet rikonstruktuar në funksion të një filmi burgu i Spaçit, që i lënë pas dore, po “merr jetë” vetëm për të qenë i gatshëm për xhirime.
Edhe Fatos Lubonja, një ditë më parë, e kritikoi këtë tjetërsim të burgut, duke theksuar se është e rëndësishme që vendi i inkurajimit të përçojë brezave memorien në gjendjen që është lënë pas largimit të të burgosurve.
Nuk dihet se ku e gjen guximin ministri Gonxhja të sulmojë të gjithë ata qytetarë, shoqata dhe zëra që kundërshtuan transformimin e burgut të Spaçit. Ai vetë përfaqëson Partinë Socialiste, që ende s’ka kërkuar falje për krimet e komunizmit si pasuese e partisë që shkaktoi mijëra viktima në Shqipëri.
Përtej kësaj, duke anatemuar edhe protesta të ngjashme të bëra për ruajtjen e pasurive publike, zoti Gonxhja thjesht na kujton të pyesim: si ka mundësi që politikanë të pangopur me pasuri dhe vota të blera si ai gjejnë ende hapësirën dhe mundësinë të sulmojnë pa argumente ata që mbrojnë trashëgiminë kulturore?
Falë Zotit, ai regjim nuk ekziston më, dhe Blendi Gonxhja nuk ka më asnjë fuqi të marrë vendime për jetët e njerëzve. Përndryshe, Spaçi nuk do ishte sot një vend kujtese, por një vend ku do të degdiseshin ata që mendojnë ndryshe nga Gonxhja dhe “gonxhet” e çelura të ish-Partisë Komuniste, sot Partia Socialiste.
