Komisioni i Ankimimeve dhe Sanksioneve (KAS) ka pranuar kërkesën e koalicionit opozitar Partia Demokratike – Aleanca për Shqipërinë Madhështore (PD-ASHM) për rinumërimin e votave të kandidatëve në qarkun Dibër, duke shënuar kështu një tjetër zhvillim të rëndësishëm pas vendimit për Tiranën.
Sipas njoftimit zyrtar, KAS shqyrtoi kërkesën ankimore nr. 41, datë 27.05.2025, të depozituar nga koalicioni PD-ASHM, ku kundërshtohej vendimi i Komisionit Qendror të Zgjedhjeve (KQZ) për miratimin e tabelës përfundimtare të rezultatit të votimeve në Dibër. Opozita kërkonte pavlefshmërinë e zgjedhjeve të 11 majit në këtë qark dhe përsëritjen e tyre.
Megjithatë, KAS vendosi unanimisht të pranojë pjesërisht kërkesën, duke urdhëruar vetëm rinumërimin dhe rivlerësimin e votave për kandidatët e koalicionit PD-ASHM në 44 qendra votimi të qarkut Dibër.
Procesi i rinumërimit do të nisë të mërkurën, më 11 qershor 2025, në orën 09:30, dhe pritet të hedhë më shumë dritë mbi pretendimet e opozitës për parregullsi në administrimin e votave të kandidatëve të saj.
Ky zhvillim vjen në vijim të tensioneve post-zgjedhore, ku PD-ASHM ka kërkuar në disa qarqe rishqyrtimin e rezultateve, duke akuzuar për manipulime dhe deformim të vullnetit të qytetarëve.
