229 kuti me materiale zgjedhore në të gjithë vendin do rihapen. Vendimi është marrë nga Komisioni i Ankimimeve dhe Sanksioneve (KAS), pas kërkesës së bërë nga Partia Demokratike.
Ky vendim u mor pas hapjes së 4 kutive të para, të cilat nuk e bindën PD-në në rregullsinë e zgjedhjeve, pasi ka ngritur dyshime për përdorimin e “trenit bullgar”.
Në 4 kutitë e rihapura në bashkitë Vlorë, Selenicë, Sarandë dhe Finiq, u konfirmua se fletët e votimit të papërdorura ishin brenda kutive, por ishin shënuar me “0” nga komisionerët, ndaj u pa se kishim të bënim me një gabim njerëzor.
Përfaqësuesi i PD-së në KAS, Franc Nuri, tha se të katërta kutitë e hapura dolën me anomali, ndaj do të duhej të kontrolloheshin të gjitha kutitë ku fletët e papërdorura janë shënuar me 0. “Hapni edhe fletët e votimit që janë me probleme, nuk po themi të gjithë qarkun, por të paktën 43 qendra votimi me anomali në raportim që thotë zero fletë të papërdorura. Unë si përfaqësuesi i PD dhe nuk e vë në dyshim këtë informacion nga KQZ, ata thonë se janë 233 qendra votimi në rang vendi me raportim anormal, hapeni dhe t’i shohim qark pas qarku. Këtë qëndrim e pata të qartë. Nga 4 qendra votimi ku u bë ky testim, të katërta dolën me anomali, nuk doli një që të përputheshin të dhënat me numrin e votuesve, fletëve që mungojnë dhe atyre të dëmtuara. E përsëris që të hapen përsëri”, tha Nuri.
Rihapja e këtyre kutive do të bëhet në Vaqarr, në prani të vëzhguesve të PD-së dhe numëruesve të KQZ-së.
