Partia Popullore Europiane (PPE) ka vendosur të përfshijë Shqipërinë në listën e vendeve ku do të dërgohet një mision faktmbledhës, pas kërkesës së drejtpërdrejtë të kryetarit të Partisë Demokratike, Sali Berisha. Lajmi u konfirmua nga Sekretarja e Përgjithshme e PPE-së, Dolors Montserrat, gjatë asamblesë politike të mbajtur në Bruksel.
“Vendosëm të bëjmë dy misione, një në Liban dhe një në Moldavi, por tani do ta vendosim si prioritet edhe Shqipërinë. Mendoj se është një ide e mirë kur na kërkoni diçka, ndaj do ta vendosim si një nga prioritetet dhe objektivat tona që të bëjmë një mision në Shqipëri,” deklaroi Montserrat.
Në fjalën e tij përpara përfaqësuesve të PPE-së, Berisha theksoi nevojën urgjente për një vëzhgim të drejtpërdrejtë nga afër të situatës në vend. Ai e cilësoi misionin si thelbësor për Shqipërinë dhe për vetë sigurinë evropiane.
“Shqipëria është një eksportuese e madhe kriminaliteti, droge dhe emigrantësh. Ky mision do të kishte vlerë të madhe për të gjithë,” tha Berisha.
