Kryetari i Partisë Demokratike, Sali Berisha, ka bërë akuza të rënda ndaj kryeministrit Edi Rama gjatë fjalës së tij në Asamblenë Parlamentare të Partive Popullore Europiane (PPE), të mbajtur këtë të martë në Bruksel. Kreu i selisë blu denoncoi zhvillimin e zgjedhjeve të 11 majit, të cilat i cilësoi si “manipulim masiv dhe farsë elektorale e organizuar nga shteti”.
“Vota në Shqipëri ishte e vdekur para se të futej në kuti,” deklaroi Berisha para delegatëve europianë. Sipas tij, aparati shtetëror u përdor në mënyrë kriminale për të siguruar fitoren e partisë në pushtet, duke abuzuar me fondet publike dhe duke shantazhuar administratën.
Ish-kryeministri ngriti edhe një herë alarmin për atë që ai e quajti “narko-shteti shqiptar”, duke akuzuar qeverinë Rama për bashkëpunim me kartele ndërkombëtare droge dhe për shpërndarje masive të licencave për kultivimin e kanabisit.
“Shqipëria nuk është më një vend demokratik. Është një narko-shtet i kapur nga krimi i organizuar, ku policia, prokuroria dhe qeveria bashkëpunojnë me trafikantët,” u shpreh Berisha, duke kërkuar ndërhyrje të menjëhershme ndërkombëtare.
Ai i bëri thirrje PPE-së që të dërgojë një mision faktmbledhës në Shqipëri për të hetuar akuzat për manipulim zgjedhor dhe lidhjet e qeverisë me botën e krimit. “Kjo është jetike jo vetëm për shqiptarët, por për gjithë kontinentin. Shqipëria po eksporton krim, drogë dhe emigracion masiv drejt vendeve tuaja,” paralajmëroi lideri opozitar.
Në fund të fjalës së tij, Berisha falënderoi PPE-në për rezolutën e mëparshme që dënonte shkeljet demokratike në Shqipëri, duke kërkuar që ajo të pasohet nga veprime konkrete dhe të prekshme në nivel europian.
