Periudha pas zgjedhore është shoqëruar me debate për rinumërim votash dhe kërkesa të njëpasnjëshme nga kandidatë që nuk siguruan mandatin e deputetit apo subjekte politike për të marrë pamjet filmike. Në disa raste për arsye të mos plotësimit të disa aspekteve ligjore kërkest janë refuzuar, apo në rastin e deputetëve socialistë që u tërhoqën pas mesazhit të kryeministrit Edi Rama.
Kërkesat për të siguruar pamjet filmike nga qendrat e numërimit është një e drejtë e çdo kandidati apo force politike për të verifikuar rezultatin që ka marrë. Madje, në shërbim të kësaj transparence Komisioni Qendror i Zgjedhjeve shpenzoi 322 milionë lekë të vjetra për shtimin e kapciteteve dhe ruajtjen për 10 vite të pamjeve filmike të qendrave të numërimit.
“Modernizimi i sistemit të menaxhimit dhe arkivimit të pamjeve filmike të proceseve zgjedhore ka për synim sigurimin e një indeksimi efikas, ruajtjeje të sigurtë dhe një akses të shpejtë për operatorët e autorizuar, në mënyrë që të forcohet transparenca dhe besueshmëria në procedurat zgjedhore” – thuhet në dokumentet e tenderit.
Megjithëse kishte dy vite kohë që nga zgjedhjet lokale që të përgatitej për zgjedhjet e 11 majit, KQZ u kujtua që tenderin ta bënte me urgjencë disa ditë para zgjedhjeve. Kështu lindi dhe nevoja që të shfrytëzohej pika 6 e nenit 42 për ligjin për prokurimet publike mbi kufirin e lartë monetar, që në rastet kur një tender është me urgjencë, mund të shkurtohet afati i paraqitjes së ofertave në 15 ditë.
Kështu, për këtë tender shfaqi interes vetëm një kompani, “FIRST sh.p.k”, e cila në mungesë të një konkurrenti tjetër u shpall fituese automatikisht me ofertën sa 90.7% të fondit limit.
Përtej procedurës, kjo shumë e shpenzuar nga buxheti i shtetit për pamjet filmike të votimit dhe në qendrat e numërimit, mund të shërbejë vetëm në këto kohë kur pretendimet për parregullsi janë eventuale. Prandaj më e drejtë do ishte që KQZ apo KAS mos t’i kursente, pasi në këtë mënyrë të paktën justifikohet edhe shuma e shpenzuar për këto pamje që pas 10 vitesh nuk i “hynë në punë as dreqit”.
