Koalicioni Euroatlantik ka reaguar në lidhje me lajmin e publikuar nga VNA paraditen e sotme për mbylljen e zyrave pas përfundimit të zgjedhjeve.
Në reagimin e tyre, Koalicioni Euroatlantik, shprehet se kjo forcë politike nuk është parti e re, por vetëm instrument ligjor për pjesëmarrje në zgjedhje, ashtu siç është bërë e qartë pas 11 qershorit 2024, që sipas tyre, pazari mes Ramës dhe Berishës prodhoi vendimin skandaloz të Apelit.
Në reagim gjithashtu thuhet se Basha nuk do heq dorë nga vula e PD, edhe nëse do të duhet të shkojë në Gjykatën e Strasburgut. Ndërsa në lidhje me zyrat, thuhet se janë ndryshuar vetëm ambientet dhe nuk ka hequr dorë nga angazhimi politik.
Reagimi i plotë:
Përshëndetje,
Në lidhje me shkrimin e publikuar sot nga redaksia juaj, me titull “Nuk mori as mandatin e tij të deputetit, Lulzim Basha mbyll zyrat e Koalicionit Euroatlantik”, dëshirojmë të sqarojmë opinionin publik dhe të përgënjeshtrojmë informacionet e pasakta që përmban ky artikull.
Së pari, nuk është krijuar asnjë parti e re nga ana jonë. Koalicioni Euroatlantik ka qenë një instrument ligjor për pjesëmarrje në zgjedhje, ashtu siç është bërë e qartë pas 11 qershorit 2024, kur pazari mes Ramës dhe Berishës prodhoi vendimin skandaloz të Apelit.
Në asnjë moment z. Basha nuk ka hequr dhe nuk do të heqë dorë nga përballja për legjitimitetin e Partisë Demokratike, qoftë në Gjykatën e Lartë, qoftë në Gjykatën e Strasburgut, nëse kjo do të jetë e nevojshme. Sepse padrejtësia nuk duhet të triumfojë në Shqipëri.
Për arsye organizative dhe për të garantuar mirëadministrimin e punës, po ndryshojmë ambientet ku do të zhvillohet aktiviteti ynë, por kjo nuk do të thotë heqje dorë nga kauza dhe angazhimi ynë politik si Partia Demokratike – Demokratët Euroatlantikë.
