Kryetarja e Kuvendit, Elisa Spiropali, kishte paralajmëruar sot se do të mbante një konferencë për mediat për përpjekjet e opozitës për të denoncuar atë që quajnë masakër zgjedhore, në institucionet ndërkombëtare.
Por Spiropali ndryshoi format, duke u shfaqur vetëm me një deklaratë për shtyp, ku tha se veprimet e opozitës synojnë njollosjen e Shqipërisë në arenën ndërkombëtare. Ajo ndër të tjera tha se këto shfaqje janë nga hidhësia e humbjes dhe për të shpikur të pavërteta si nevoje nevoje e përpjekjes së fundit për mbijetese politike.
“Dënoj me forcë përpjekjet e atyre që nuk po lënë gur pa lëvizur e fjalë të zezë pa thënë për vendin e tyre, vetëm për të bishtnuar përgjegjësisë. E kam fjalën për ata që, pasi kanë nxirë fytyrën e tyre dhe kanë shkatërruar gjithçka rreth vetes, tani janë sulur për të përdhosur emrin e Shqipërisë dhe të shqiptarëve. Me hidhësinë e humbësit të keq dhe pandreqësinë që i karakterizon janë sulur për të përdhosur emrin e Shqipërisë, të përdhosin reputacionin e tokës tonë të përbashkët me teori komploti, me akuza qesharake dhe absurde, me të pavërteta të shpikura si nevoje e përpjekjes së fundit për mbijetese politike”, tha Spiropali.
Megjithatë mbetet e paqartë se pse Spiropali nuk doli në konferencë për mediat siç e kishte paralajmëruar. Me gjasë kryetarja e Kuvendit i ka rënë pishmanit për t’u përballur me pyetjet e gazetarëve që do të duhej pak më shumë kohë për të kritikuar veprimet e opozitës dhe zgjodhi që të shfaqej me një deklaratë sa për të justifikuar njoftimin.
