Pasi nuk arriti të merrte mandatin për parlamentin e ardhshëm, deputeti i PS, Plarent Ndreca e vetmja beteje që i ka mbetur tashmë do jetë drejtësia.
Në një postim në rrjetet sociale, Ndreca ka kritikuar Inspektoriatin e Lartë të Drejtësisë se është një institucion i dështuar. Deputeti i PS shprehet se prej një viti është përfshirë në një debat me ILD për shkeljet kushtetuese të institucioneve të drejtësisë.
“Prej më shumë se një viti (që nga Maji i vitit 2024 në mbledhjen e Komisionit të Ligjeve) jam përfshirë në një debat institucional me Inspektorin e Lartë të Drejtësisë, për mosveprimin e tij ndaj shkeljeve të rënda kushtetuese nga institucionet e drejtësisë – përfshirë një hetim penal konkret, si sintomë e një problemi sistemik, që ka sot drejtësia në përgjithësi dhe ajo penale në veçanti.
Pas një heshtjeje të gjatë dhe pas dy shkresave të mia dërguar edhe gjithë autoriteteve kombëtare dhe ndërkombëtare që merren me drejtësinë, më në fund ka ardhur një përgjigje shkresore nga ILD, cila provon vetëm një fakt: dështimin e këtij institucioni dhe bashkë me të, dështimin e një instrumenti kushtetues për zbatimin e parimit “kontroll dhe balancë” midis pushteteve. Ky dështim e ka vendosur pushtetin gjyqësor në një pozitë të pakontrolluar, të pabalancuar dhe për rrjedhojë të papërgjegjshme, duke cenuar rëndë themelet e shtetit të së drejtës”, shprehet ndër të tjera Ndreca.
Por shqetësimi për funksionimin e drejtësisë, deputetit të PS i lindën në kohën kur SPAK e mori nën hetim për tenderat e komisariateve gjatë kohës kur mbante postin e sekretarit të Përgjithshëm Ministrisë së Brendshme.
Ai është marrë i pandehur nga SPAK për akuzën e “shkeljes dhe pabarazisë në tenderë”, pasi Plarent Ndreca dhe disa zyrtarë të tjerë të Ministrisë së Brendshme, dyshohet se favorizuan në shkelje ligjore një subjekt për të fituar tendera me vlerë 34 milionë lekë.
Dhe siç ka ndodhur me të gjithë zyrtarët që janë vënë nën akuzë, nisin kritikat apo sulmet ndaj drejtësië, mesa duket kjo po ndodh edhe me deputetin e PS.
Ndërsa është zyrtarisht nën akuzë dhe hetimet ende po vazhdojnë, ai në rastin më të keq do të duhet të paraqitet tashmë jo më si deputet. Dhe në mungesë të “mburojës” së mandatit, Ndreca mesa duket po zhfrytëzon statuset në facebook, në tentativë për të kritikuar gabimet që sipas tij bartin institucionet e drejtësisë. Se sa do ta ndihmojnë, mbetet për t’u parë. Por statuset duhet t’i bëjë me karar, sepse shefi i tij në qeveri nuk preferon që nga forca e tij politike të dalin kritika ndaj drejtësisë, përveç rasteve kur kur i bën ai vet.
