Seanca e sotme plenare në Kuvendin e Shqipërisë u dominua nga përplasjet e ashpra mes përfaqësuesve të opozitës dhe mazhorancës, me fokus tek zgjedhjet e 11 majit dhe legjitimiteti i pushtetit aktual.
Sekretari i Përgjithshëm i Partisë Demokratike, Flamur Noka, në një fjalim të drejtpërdrejtë, e cilësoi procesin zgjedhor si një “farsë elektorale” që, sipas tij, nuk përfaqëson vullnetin e lirë të qytetarëve shqiptarë.
“11 maji ishte një farsë elektorale. Pushteti i mazhorancës nuk ka asnjë legjitimitet për sa kohë nuk buron nga vota dhe vullneti i qytetarëve,” deklaroi Noka, duke akuzuar qeverinë për kapjen e institucioneve dhe përdorimin e një fasade demokratike për të mbuluar mungesën reale të garës politike.
Ai shtoi se opozita është përballur në mënyrë të pabarabartë me një aparat shtetëror të vënë në funksion të fushatës së Partisë Socialiste, i mbështetur nga grupe kriminale.
Në reagim, kreu i grupit parlamentar të PS-së, Taulant Balla, sfidoi Nokën të dorëzojë çdo provë të pretenduar në Prokurorinë e Posaçme (SPAK), duke theksuar se akuzat për gjurmimin e votës përbëjnë vepër penale.
“O Flamur, kjo që thua ti është vepër penale sepse identifikimi dhe gjurmimi i votës janë të dënueshme. Nëse ti e ke provë këtë, pse nuk e dorëzon në Prokurorinë e Posaçme?”, tha Balla.
Ai theksoi se Partia Socialiste ka fituar zgjedhjet në mënyrë bindëse me mbi 856 mijë vota, ndërsa opozita ka dalë shumë prapa.
“Zgjedhjet në Shqipëri kanë përfunduar. PS ka marrë 856 mijë vota, ju keni marrë 300 mijë e kusur më pak. Gjejeni ku i keni votat tuaja”, shtoi ai.
Duke ironizuar pretendimet për vendosjen e GPS-ve në zarfe në Selanik, Balla u shpreh:
“Bëtë gjithë atë zhurmë për kryeplakun e Pekishtit dhe kur doli që nuk kishte asgjë, i jeni turrur pas 130 mijë të ashtuquajturave vota. Më thanë që e kishte thënë Flamuri në një studio se paskan futur 500 GPS në zarfa dhe këto paskan ngelur në Londër.”
Përplasjet në Kuvend vijnë në vazhdën e tensioneve politike që pas mbajtjes së zgjedhjeve vendore, ku opozita vijon të kontestojë rezultatin dhe të akuzojë mazhorancën për manipulim masiv, ndërkohë që PS këmbëngul në legjitimitetin e fitores së saj dhe sfidon opozitën të paraqesë prova konkrete.
