Maxhoranca dhe opozita kanë dhënë sinjalet e para për ngritjen e një komisioni të posaçëm për reformën zgjedhore, me nisjen e legjislaturës së re në shtator.
Pavarësisht akuzave për manipulim të procesit zgjedhor, deputeti demokrat Oerd Bylykbashi theksoi nevojën për një reformë zgjedhore gjithëpërfshirëse dhe të bazuar në konsensus, në kuadër të parlamentit të ri.
“Ne vumë tre ligje për të mbrojtur zgjedhjet, Kod Zgjedhor, Kod Penal, Kod Procedure Penale, me gjithë SPAK-un brenda”, tha Bylykbashi.
Nga ana tjetër, edhe pse Partia Socialiste ka një interpretim tjetër të rezultatit zgjedhor, ajo ka shprehur gatishmërinë për dialog, të paktën këtë tha deputeti Damian Gjiknuri.
“Po nuk mësuam këtë rregull A të demokracisë që humbësi pranon zgjedhjet, pranon rezultatin dhe nxjerr konkluzion, çështjete zgjedhjeve do të jenë gjithmonë objekt i politikës së përditshme. Fatkeqësisht në këtë pikë jemi tashmë”, tha Gjiknuri.
Ndonëse rastet mëparshme nuk kanë prodhuar ndonjë kod zgjedhor serioz por vetëm kanë hartuar dëshirat e kryetarëve të tyre, dy bashkëkryetarët e reformës zgjedhore, Bylykbashi dhe Gjiknuri, e shprehën nga foltorja e Kuvendit vullnetin për të rifilluar punën në tryezën e përbashkët të dialogut politik.
Megjithatë mbetet për t’u parë se çfarë çudie tjetër do të hartojnë, pasi në zgjedhjet e 11 majit na servirën një listë paksa të çuditshme ku gjysma ishte e mbyllur dhe gjysma e hapur.
