Pas vendimit të marrë për hapjen e kutive të votimit dhe rinumërimin në qarkun e Tiranës, burime pranë Komisionit Qendror të Zgjedhjeve (KQZ) bëjnë me dije se procesi do të kërkojë rreth 10 ditë kohë.
"Na duhen rreth 10 ditë kohë të përgatisim gjithë infrastrukturën njerëzore dhe teknike për këtë proces. Po mendohet që rinumërimi i qarkut Tiranë dhe kutive të qarkut të Dibrës të bëhet në Parkun Olimpik", bëjnë të ditur burime mediatike.
Në qarkun e Tiranës do të hapen gjithsej 1,282 kuti votimi, ku do të rinumërohen si votat për subjektet politike, ashtu edhe ato për kandidatët e veçantë. Rinumërimi përfshin gjithashtu edhe kutitë e përzgjedhura në qarkun e Dibrës.
Ky proces vjen pas kërkesave të PD ASHM dhe sinjaleve për parregullsi që kanë sjellë vendimin për verifikim të detajuar të rezultatit zgjedhor. KQZ pritet të japë më shumë informacion në ditët në vijim mbi mënyrën e organizimit dhe përfshirjen e vëzhguesve në këtë proces.
