Sot ish të përndjekurit politikë dhe aktivistë kanë thirrur një protestë në mbrojtje të ish burgut të Spaçit, në të cilin së fundmi kanë nisur punime në kuadër të realizimit të një filmi.
Vetëm pak minuta para nisjes së protestës, e cila mbahet sot në 12:30, Ministria e Kulturës, ndryshe nga dje kur cilësonte "Sanço Panço" të gjithë ata që reaguan kundër, deklaron se në fakt po "konservon burgun".
Ndër të tjera në reagim pranon gjithashtu se do ketë "elementet e tjerë si një kullë metalike, një copë rrethimi, një portë dhe një fragment kangjelle të përfshira në kontratë, do të realizohen vetëm pas zbërthimit të detajuar bazuar në foto e dëshmi historike si edhe do të jenë të çmontueshme në rast ndërhyrjesh të tjera në vijim sipas Planit të Menaxhimit (çdo informacion do të jetë publik)"-shkruhet në reagimin e ministrisë.
Më tej deklarohet se "Nuk është pjesë e ndërhyrjes ringritja e banjove dhe terracës mbi to, as nuk është aprovuar nga IKTK dhe as nuk përfshihet në projekt e kontratë!", duke lënë të hapur mundësinë e rishqyrtimit të projektit i cili, siç shkruhet është në fazë shqyrtimi.
Ndaj dhe kërkon ndjesë atyre që me të drejtë u alarmuan nga dy foto të punimeve fillestare. "Ndjesë për shqetësimin, edhe pse në çdo rast zbatimi do të respektonte projektin dhe kushtet e kontratës!"-përfundon reagimi.
Kjo deklaratë më shumë se sqarim për projektin apo "ndjesë" për mijëra ish të përndjekur dhe qytetarë të lirë që me të drejtë i shqetësuan për fshirjen e historisë së burgut të Spaçit, duket si një "zbapsje" me lezet e ministrisë së Kulturës.
