Kryetari i Partisë Demokratike, Sali Berisha, ka akuzuar Edi Ramën për punimet në në ish-burgun famëkeq të Spaçit, duke akuzuar kryeministrin se po përdor fondet publike për të “fshirë me suva kujtesën kolektive të vuajtjeve të diktaturës”.
Në një dalje për mediat, Berisha tha se ndërhyrjet në strukturat e rrënuara të kampit të Spaçit nuk kanë për qëllim ruajtjen e së vërtetës historike, por përkundrazi “rilyerjen e një historie të përgjakshme me bojë politike”.
“Edi Rama nuk po restauron. Ai po manipulon. Ai po përpiqet të bëjë të padukshme dhimbjen, vuajtjen dhe qëndresën që Spaçi përfaqëson për shqiptarët antikomunistë,” deklaroi Berisha.
Sipas tij, restaurimi po shërben si një maskë për të zbutur përgjegjësinë morale dhe politike të pasardhësve të regjimit komunist, të cilët, siç tha ai, sot mbajnë pushtetin.
“Çdo mure i suvatuar, çdo tel i zëvendësuar në Spaç është një tentativë për të rikonfiguruar memorien tonë historike. Ata nuk duan që brezat e rinj të shohin se çfarë ka qenë komunizmi – një diktaturë e egër, një regjim i dhunës dhe internimeve,” shtoi lideri i opozitës.
Berisha theksoi se Partia Demokratike do të kundërshtojë çdo projekt që synon, sipas tij, të zhbëjë autenticitetin e vendeve të kujtesës kombëtare dhe do të kërkojë transparencë të plotë mbi ndërhyrjet në Spaç.
“Spaçi nuk ka nevojë për ngjyra të reja, por për të treguar të vërtetën e tij të ftohtë dhe të hidhur. Vetëm kështu do të mund të ndërtojmë një shoqëri që nuk harron dhe nuk përsërit krimet e së shkuarës,” përfundoi ai.
Më herët ministria e Ekonomisë, Kulturës dhe Inovacionit përmes një reagimi publik deklaroi se punimet ishin "konservuese" dhe se projekti do të bëhej publikë.
Por paralelisht me këto zhvillime, aktivistë, qytetarë dhe ish të përndjekur kanë mbajtur një protestë në shenjë kundërshtie ndaj këtyre punimeve.
