Pas vendimit të KAS për rinumërimin e votave në Fier dhe Tiranë, ish-deputeti Myslim Murrizi ka reaguar ashpër në rrjetet sociale, duke akuzuar drejtpërdrejt dy përfaqësues të Partisë Demokratike, Oerd Bylykbashin dhe Gazment Bardhin.
Sipas Murrizit, nga 5200 qendra votimi në të gjithë Shqipërinë, do të rinumërohen 1914 qendra, ose rreth 40% e totalit. Në veçanti, dy qarqet më të mëdha, Tirana dhe Fieri, do të rinumërohen tërësisht.
Duke iu drejtuar Bylykbashit dhe Bardhit, Murrizi ngriti pyetjen pse Partia Demokratike ka zgjedhur t’i besojë më shumë administratës zgjedhore të KQZ-së së drejtuar nga Ilirjan Celibashi, sesa komisionerëve dhe numëruesve të saj.
“Pse nuk u dakordësuat me rekomandimet 10-vjeçare të OSBE/ODIHR për të pasur administratë zgjedhore dhe komisionerë politikë nga PD, PS, LSI?”, pyet Murrizi.
Në një akuzë të drejtpërdrejtë, ai shton:
“Për Kodin Zgjedhor bastard, që mbyllët 90% të fituesve — nga 50 deputetë mbyllët 46 — e di që e bëtë për by… tuaj të përdredhur, se keni frikë si dreqi të shkoni te vota e qytetarit.”
Murrizi theksoi se demokratët janë ata që po paguajnë çmimin për këtë situatë dhe për mungesën e transparencës e besimit në procesin zgjedhor:
“Po demokratët çfarë faji kanë që të durojnë mosbesimin dhe mosvlerësimin tuaj?”, përfundon reagimin e tij Murrizi.
