Kosova ka shmangur zgjedhjet e reja parlamentare pas një seance të jashtëzakonshme të Kuvendit, ku Justina Shiroka Pula u zgjodh presidente e Republikës me 81 vota. Agjencia ndërkombëtare e lajmeve Reuters raporton se votimi u zhvillua në orët e para të së mërkurës, pak para përfundimit të afatit kushtetues.
Sipas Reuters, Shiroka Pula mori 81 vota në Kuvendin me 120 deputetë, duke siguruar vetëm një votë më shumë se numri i nevojshëm. Moszgjedhja e presidentit brenda afatit do të çonte në shpërndarjen e Kuvendit dhe organizimin e zgjedhjeve të reja parlamentare, një skenar që Kosova e kishte përjetuar edhe në qershor.
Reuters raporton se zgjedhja e Shiroka Pulës erdhi pas një marrëveshjeje politike mes Lëvizjes Vetëvendosje të kryeministrit Albin Kurti dhe Partisë Demokratike të Kosovës. Votimi u zhvillua në një moment kur në Kuvend po zhvillohej debat edhe për ndryshimet në ligjin për Dhomat e Specializuara të Kosovës në Hagë.
Sipas agjencisë, në të njëjtën seancë të jashtëzakonshme Kuvendi miratoi edhe ndryshimet në ligjin për Dhomat e Specializuara, me 88 vota për.
Pas votimit, Shiroka Pula deklaroi se mandati i saj nuk i përket vetëm një personi, por qytetarëve të Kosovës, duke u zotuar se do të jetë presidente e të gjithë qytetarëve.
Justina Shiroka Pula, e lindur në vitin 1953, është presidente e Akademisë së Shkencave dhe Arteve të Kosovës dhe profesoreshë e ekonomisë. Ajo ka shërbyer edhe si ministre e Ekonomisë në periudhën 2008–2011.
Sipas Reuters, zgjedhja e saj në krye të shtetit ka shmangur një tjetër krizë politike dhe skenarin e zgjedhjeve të reja parlamentare në Kosovë.
