Komisioni i Ankimimeve dhe Sanksioneve (KAS), me kërkesë të dy anëtarëve, ka vendosur rinumërimin e një pjese të konsiderueshme të votave në qarkun e Durrësit, pas shqyrtimit të disa kërkesave ankimore.
Në vendimin e marrë këtë të martë, KAS miratoi hapjen e të gjitha kutive të KZAZ nr. 21 dhe 22, si dhe të 126 kutive të tjera të listuara në kërkesën e paraqitur nga koalicioni PD-ASHM.
Po ashtu, KAS vendosi hapjen dhe rinumërimin e 100% të fletëve të votimit të ardhura nga diaspora, gjithashtu sipas kërkesës së PD-ASHM.
Një tjetër vendim i rëndësishëm ishte pranimi i kërkesës së Partisë Lëvizja e Legalitetit, nëpërmjet së cilës do të hapen edhe 60 kuti votimi. Ky vendim përfshin edhe kutitë që mbajnë votat për kandidatin e kësaj force politike në Durrës, Aulon Kalaja, i cili kishte kërkuar rinumërim përmes subjektit që e mbështeti në këtë kërkesë.
Në total, sipas kësaj vendimmarrjeje, do të hapen dhe rinumërohen rreth 60% e kutive të votimit brenda territorit të qarkut Durrës, përveç votave të diasporës, që do të rinumërohen plotësisht.
Ky është qarku i tretë, pas Tiranës dhe Fierit, ku dy anëtarë të KAS përdorin dispozitën ligjore që kanë në dispozicion për të rinumëruat votat. Proçesi parashikohet të nisë javën e ardhshme dhe pritet të zgjasë nga 18-20 ditë.
