Prej vitit 2018, ISKK i ka propozuar Ministrisë së Kulturës shpalljen Muze Kombëtar të tre objekteve me rëndësi për kujtesën kolektive gjatë regjimit komunist: Kamp-burgu i Spaçit, Kampi i internimit me tela me gjemba në Tepelenë si, dhe Shtëpinë e Blloshmëve në Bërzeshtë, Librazhd, në kujtim të poetëve të ekzekutuar Vilson Blloshmi dhe Genc Leka. Në një postim në rrjetin social Facebook, kreu i ISKK, Çelo Hoxha shkruan se pas këtij propozimi nuk ka pasur ndonjë progres në drejtimin e kërkuar. Objektet e propozuara nuk e kanë marrë ende statusin muze. Lidhur me diskutimet publike të javëve të fundit për ndërhyrjet ndërtimore që janë bërë në ish-kamp burgun e Spaçit, të cilat mendohet sa kanë dëmtuar autenticitetin e godinave, ISKK nuk zotëron ekspertë që mund të ketë një qëndrim zyrtar në lidhje apsektet profesionale. Në parim, ISKK i bashkohet shqetësimit publik për ruajtjen e autenticitetit të vendeve të vuajtjes në komunizëm, jo vetëm të Spaçit, për t’u përcjellë brezave kujtesën historike. ISKK u bën thirrje gjithë institucioneve dhe entiteteve të përfshira në punimet që bëhen në ish-kamp burgun e Spaçit të veprojnë në përputhje me ligjin e ruajtjes së trashëgimisë kulturore dhe të zonave të mbrojtura. ISKK dhe një herë sjell në vëmendje të institucioneve propozimin e shkresës nr. prot. 644, datë 07.09.2018, “Për miratimin e muzeve kombëtarë”. Në fund ISKK shkruan se fton gjithë faktorët e interesuar ta mbështesin këtë propozim dhe të lobojnë për realizimin e tij.
