58 deputetë të rinj të PS do marrin leksione nga Edi Rama se si duhet të sillen në Kuvend. Ata madje do të duhet të shtyjnë pushimet, pasi fillimisht do të marrin pjesë në një shkollë verore që do të zgjasë një muaj, nga data 20 qershor deri më 20 korrik. Lektorët e Akademisë Politike do të jenë drejtuesit më të lartë të qeverisë, partisë dhe Kuvendit: Kryeministri Rama, Kryetarja e Kuvendit Spiropali, nënkryetari i Kuvendit Çuçi, Ministrat Balla dhe Pirdeni, Kryetarët e Komisionit Antikorrupsion dhe Kundër Dezinformimit, Xhafaj dhe Braçe, si dhe deputetë të tjerë.
Leksionet do të zhvillohen çdo fundjavë të korrikut, ndërsa pyetja që lind në këto raste është: çfarë do t’i mësojë Edi Rama talenteve të reja socialiste? Ligjin? Etikën? Apo batutat? Sepse sa për Spiropalin dhe ndonjë tjetër, është e qartë që leksioni i vetëm mbetet të jetë: mos ndiqni rrugën tonë se mund të përfundoni në SPAK. Ose në rastin më të mirë do të jeni objekt talljesh e një grupi politik që s’ka më asnjë personalitet të spikatur, veç kopje të shëmtuara të “Shefit të Madh.”
