Presidenti francez Emmanuel Macron ka shënuar nivelin më të ulët të popullaritetit që nga ardhja në pushtet në vitin 2017. Rënia vjen ndërsa qeveria përballet me protesta të nxënësve të shkollave të mesme, krizën e karburanteve dhe vështirësi në diskutimet për buxhetin në një parlament pa shumicë të qartë.
Sipas sondazhit Ipsos BVA-CESI për gazetën “La Tribune Dimanche”, vetëm 15% e të anketuarve kanë opinion pozitiv për veprimtarinë e Macron, një pikë përqindjeje më pak se në shtator. Ndërkohë, 82% shprehen negativisht për punën e presidentit.
Kryeministri Sébastien Lecornu ka shënuar një përmirësim të lehtë. Vlerësimi pozitiv për veprimtarinë e tij është rritur me dy pikë, në 22%, por pakënaqësia mbetet e lartë.
Terren kanë humbur edhe dy figurat kryesore të së djathtës ekstreme, Jordan Bardella dhe Marine Le Pen. Në pyetjen se sa të kënaqur do të ishin francezët nëse njëri prej tyre zgjidhej president, Bardella merr 33%, duke humbur tre pikë, ndërsa Le Pen 32%, katër pikë më pak. Megjithatë, të dy vazhdojnë të kryesojnë renditjen e pasuesve të mundshëm të Macron.
Rënia e tyre përkon me publikimin nga Mediapart të mesazheve antisemite dhe konspirative që i atribuohen një llogarie të vjetër në Facebook të Bardella-s. Kreu i partisë Tubimi Kombëtar i ka mohuar akuzat.
Fuqia blerëse mbetet shqetësimi kryesor për francezët, e përmendur nga 54% e të anketuarve, e ndjekur nga e ardhmja e sistemit të mbrojtjes sociale dhe borxhi publik. Sondazhi u krye në internet më 7–8 tetor 2026, me pjesëmarrjen e 1.000 të rriturve.
