Një ekspeditë e re shkencore është nisur drejt një ishulli të pabanuar në Oqeanin Paqësor, me synimin për të zbardhur një nga misteret më të mëdha të historisë së aviacionit: zhdukjen e pilotes amerikane Amelia Earhart, e cila humbi gjurmët në vitin 1937.
Një ekip prej 17 studiuesish po udhëton drejt ishullit Nikumaroro, ku do të hetojë një objekt të pazakontë të identifikuar në pamjet satelitore të një lagune. Studiuesit dyshojnë se ai mund të jetë mbetja e avionit Lockheed Electra, me të cilin Earhart po përpiqej të realizonte fluturimin rreth botës.
Ekspedita, me një kosto të vlerësuar rreth 900 mijë dollarë, pritet të mbërrijë në ishull më 13 tetor. Ekipi do të përdorë pajisje të specializuara për të kontrolluar objektin dhe për të përcaktuar nëse ai ka lidhje me avionin e zhdukur.
Amelia Earhart ishte një nga aviatorët më të njohur të shekullit XX. Ajo u bë gruaja e parë që fluturoi e vetme mbi Oqeanin Atlantik, duke sfiduar kufijtë e aviacionit dhe paragjykimet e kohës.
Më 2 korrik 1937, gjatë një etape të udhëtimit rreth botës, Earhart dhe navigatori i saj Fred Noonan humbën kontaktet radiofonike teksa po fluturonin drejt ishullit Howland, në Paqësorin qendror.
Pavarësisht kërkimeve të gjera të asaj kohe dhe ekspeditave të shumta gjatë dekadave, avioni i tyre nuk është gjetur përfundimisht.
Një nga teoritë më të diskutuara është se Earhart dhe Noonan mund të kenë përfunduar në ishullin Nikumaroro, ku kanë tentuar të mbijetojnë për një periudhë përpara se të humbnin jetën. Megjithatë, kjo hipotezë nuk është provuar.
Objekti që do të hetohet në ekspeditën e re është identifikuar në imazhe satelitore, por disa ekspertë janë skeptikë dhe mendojnë se mund të jetë thjesht një pemë e rrëzuar ose një formacion natyror.
Studiuesit shpresojnë se kontrollet në terren do të japin një përgjigje më të qartë, edhe pse nuk ka garanci se objekti i zbuluar është pjesë e avionit.
Pas 89 vjetësh, zhdukja e Amelia Earhart mbetet një nga historitë më intriguese të aviacionit, ndërsa çdo ekspeditë e re rikthen shpresën se misteri mund të zgjidhet.
