Një itinerar i ri historik në Connecticut të SHBA-së po rikthen në vëmendje gjyqet për magji që nisën më shumë se katër dekada përpara proceseve famëkeqe të Salemit.
Rruga përfshin mbi 130 vende të lidhura me histori tragjike dhe legjenda lokale. Mes ndalesave është memoriali në Windsor për Alice, e njohur edhe si Alse Young, personi i parë i dokumentuar që u ekzekutua për magji në kolonitë amerikane.
Young u var më 26 maj 1647. Sipas historisë së paraqitur nga BBC, dyshimet ndaj saj u lidhën me faktin që ajo dhe vajza i mbijetuan një epidemie gripi, ndërsa katër fëmijë të fqinjëve vdiqën.
Nga viti 1647 deri më 1697, të paktën 49 persona në Connecticut u akuzuan për magji. Prej tyre, 34 u përballën me akuza formale dhe të paktën 11 u varën. Proceset u ushqyen nga frika fetare dhe pretendimet se të akuzuarit përdornin fuqi të mbinatyrshme për të dëmtuar të tjerët.
Megjithëse Salemi mbeti simboli më i njohur i kësaj përndjekjeje, historia e Connecticut u la për një kohë të gjatë në hije.
Në vitin 2023, ligjvënësit e shtetit miratuan një rezolutë që shfajësonte viktimat. Itinerari i ri u mundëson vizitorëve të njohin historitë e njerëzve të dënuar padrejtësisht.
