Kompanitë evropiane të industrisë së mbrojtjes po shtojnë masat për mbrojtjen e drejtuesve të tyre të lartë, pas paralajmërimeve të shërbimeve të inteligjencës se Rusia po intensifikon përpjekjet për të shënjestruar personat që drejtojnë kompani të angazhuara në mbështetjen ushtarake të Ukrainës.
Sipas Financial Times, zyrtarë të pesë agjencive evropiane të inteligjencës kanë paralajmëruar se operativët rusë po synojnë gjithnjë e më shumë drejtuesit ekzekutivë dhe persona të tjerë kyç të kompanive të mbrojtjes. Këto zhvillime lidhen me zgjerimin e operacioneve të dyshuara të sabotimit dhe të veprimeve hibride të Moskës në Evropë. Rreziku nuk kufizohet vetëm te prodhuesit e mëdhenj të armëve, por përfshin edhe kompani më të vogla që prodhojnë dronë dhe komponentë ushtarakë.
Shërbimi gjerman i inteligjencës së brendshme, BfV, ka intensifikuar kontaktet me drejtuesit dhe punonjësit e kompanive të mbrojtjes, duke u rekomanduar masa shtesë sigurie, përfshirë në raste të caktuara edhe angazhimin e ekipeve private për mbrojtje të afërt.
Drejtori i BfV-së, Sinan Selen, u ka thënë ligjvënësve gjermanë se Rusia po planifikon qëllimisht akte dhune ndaj individëve, përmes aktorëve shtetërorë ose personave që veprojnë nën kontrollin e shtetit rus. Sipas tij, metodat dhe objektivat e këtyre operacioneve po ndryshojnë, ndërsa në to po përfshihen gjithnjë e më shumë edhe rrjete të krimit të organizuar.
Gjatë gjashtë muajve të fundit, drejtuesit e disa kompanive kanë forcuar mbrojtjen personale pas këshillave të autoriteteve të sigurisë. Masat zbatohen veçanërisht gjatë udhëtimeve jashtë vendit, por disa kompani kanë zgjeruar mbrojtjen edhe në jetën e përditshme të drejtuesve të tyre.
Sipas zyrtarëve të inteligjencës, në këto operacione dyshohet se rol të rëndësishëm ka Shërbimi i Inteligjencës Ushtarake të Rusisë, GRU, i cili, sipas burimeve, po bashkëpunon me rrjete agjentësh dhe grupe të krimit të organizuar. Operacionet përfshijnë veprimtari të koordinuara, nga vëzhgimi dhe logjistika deri te planifikimi dhe zbatimi.
Zyrtarët bëjnë të ditur se disa plane janë zbuluar dhe parandaluar, ndërsa në raste të tjera është konstatuar mbikëqyrje e dyshimtë pranë banesave dhe vendeve të punës së personave të shënjestruar. Sipas vlerësimeve të tyre, synimi është edhe psikologjik, krijimi i një ndjenje pasigurie që mund t'i shtyjë kompanitë të kufizojnë bashkëpunimin me Ukrainën.
Presioni po shtrihet edhe në sektorët e infrastrukturës kritike dhe të energjisë. Claudine Fry, partnere në kompaninë londineze të menaxhimit të rrezikut Control Risks, thotë se kompanitë po i marrin gjithnjë e më seriozisht rreziqet ndaj drejtuesve dhe punonjësve të tyre.
Rritja e shpenzimeve për sigurinë po kthehet në një barrë të konsiderueshme, veçanërisht për kompanitë e reja të industrisë së mbrojtjes. Sipas raportimeve, një objekt prodhimi në Evropën Perëndimore është zhvendosur së fundmi për shkak të kërcënimeve të dyshuara ruse.
Kompanitë e mëdha të armatimit janë në gatishmëri të shtuar që prej vitit 2024, kur shërbimet amerikane dhe gjermane të inteligjencës zbuluan një komplot të dyshuar rus që synonte Armin Pappergerin, drejtorin ekzekutiv të kompanisë gjermane Rheinmetall, një nga mbështetëset kryesore të furnizimit të Ukrainës me armë.
Papperger ka deklaruar se tashmë shoqërohet vazhdimisht nga truproja private dhe policia. Rasti i tij është kthyer në një nga shembujt më të spikatur të rreziqeve të sigurisë me të cilat përballen drejtuesit e industrisë evropiane të mbrojtjes, ndërsa vendet perëndimore rrisin mbështetjen ushtarake për Kievin.
