Kryebashkiaku i Tiranës, Erion Veliaj, i cili po mbahet nën masën e arrestit me burg nën dyshimet për korrupsion e pastrim parash, i është drejtuar Gjykatës së Lartë me rekurs. Avokatët e kanë postuar dokumentin përmes postës dhe ndër të tjera pretendojnë ndryshimin e masës së sigurisë për Veliajn, për shkak se sipas tyre nuk ekzistojnë kushte dhe kritere për ta mbajtur atë në qeli.
Burimet thonë se Veliaj i thotë gjykatës supreme, se nuk ka asnjë rrezik që ai të prishë provat dhe të largohet jashtë vendit dhe se është i zgjedhur vendor e duhet të kthehet në krye të bashkisë. Erion Veliaj mbahet në paraburgim prej 10 shkurtit të këtij viti, me vendim të gjykatës së Posacme, që më pas u la në fuqi dhe nga Apeli i Posacëm.
Ai po hetohet bashkë me bashkëshorten Ajola Xoxa, që është nën masën e detyrimit për paraqitje dhe gjashtë biznesmenë, të cilët dyshohen për lidhje klienteliste me kryebashkiakun.
