Sali Berisha ka prezantuar sot koalicionin e Shqipërisë Madhështore, duke u kujdesur që disa nga aleatët, përfshirë Kujtim Gjuzin dhe ndonjë tjetër, t’i lërë në radhët e fundit të ceremonisë. Shqipëria nuk ka parë kurrë një koalicion me këto potenciale të jashtëzakonshme, me këtë vendosmëri të palëkundur dhe me këtë ekspertizë të përsosur.
Berisha këmbënguli që aleancat e PD-së janë pritur me interes të madh nga shqiptarët dhe shumë shpejt do të përballet me narkoregjimin dhe do të fitojë, sepse e nis përballjen me një epërsi të madhe morale.
Kryetari i PD-së tha sot në ceremoninë e prezantimit të aleancës për Shqipërinë Madhështore se ky koalicion do të bëjë të mundur që nafta të mos jetë as 1 qindarkë më shtrenjtë se në Kosovë. Berisha theksoi se energjia elektrike do të ulet, ku për bizneset do të jetë 6 lekë, ndërsa përsëriti premtimet për rrogën minimale, që nuk do të jetë më e ulët se 500 euro.
