Kryeministri Edi Rama ka dhënë detaje mbi procesin e përzgjedhjes së kandidatëve për zgjedhjet e ardhshme parlamentare. Ai ka sqaruar se çdo deputet mashkull që ka pasur një mandat nuk do të jetë në listën e mbyllur.
“Nuk e kemi mbyllur ende të gjithë procesin që do të finalizohet në Kryesi, por parimi është i qartë: asnjë deputet mashkull që ka marrë mandat nuk do të jetë në listën e mbyllur,” deklaroi Rama.
Lidhur me drejtuesit politikë, Rama theksoi se ata nuk do të përfshihen në preferenca, me qëllim që të krijohet një ekip i bashkuar.
“Drejtuesi politik nuk duhet të futet në preferenca, pasi na duhet një ekip kompakt. Lista e hapur do të jetë një garë mes atyre që kanë eksperiencë në politikë,” shtoi ai.
Sa i përket përfshirjes së tij në lista, Rama la të hapur mundësinë që të mos kandidojë fare. “Vendimin për vete nuk e kam marrë ende. Mund të mos jem fare në listë,” tha ai.
Ndërkohë, të rinjtë dhe të rejat që do të hyjnë për herë të parë në politikë do të jenë në listën e mbyllur, duke e bërë partinë “më të re,” sipas Ramës.
