Kryeministri Edi Rama mblodhi sot grupin parlamentar të Partisë Socialiste, në një takim ku pritej të diskutoheshin edhe listat e kandidatëve për zgjedhjet e 11 majit. Megjithatë, fokusi i fjalës së tij ishte procesi i integrimit në bashkimin europian dhe reforma në drejtësi.
Rama theksoi se PS duhet të fitojë mandatin e katërt për të përfunduar negociatat dhe për të mos rrezikuar procesin e anëtarësimit deri në vitin 2027. Ai u shpreh se shpejtësia me të cilën shqipëria ka avancuar është “e paprecedentë” dhe se “asnjë vend i rajonit nuk ka ecur me këtë ritëm”.
“Janë 1000 persona të angazhuar çdo ditë për negociatat, 40 drejtues grupesh dhe një strukturë e ndërtuar për të siguruar suksesin e procesit. 11 maji duhet të jetë vula e vullnetit popullor për t’i dhënë ps mandatin e katërt dhe për të mos humbur asnjë ditë në këtë rrugë”, tha Rama.
Ndërkohë, kryeministri foli edhe për reformën në drejtësi, duke akuzuar opozitën se synon të bllokojë spak dhe të zhbëjë reformën. “Kënetat duan të shkrijë Spak-un, por ne jemi garancia për vijimin e reformës dhe të integrimit”, deklaroi ai.
Në takimin e sotëm nuk pati njoftim për listën e kandidatëve për deputetë, ndërsa pritet që ajo të bëhet publike në ditët në vijim.
