Në një aktivitet me gra dhe vajza nga i gjithë vendi, kryeministri Edi Rama konfirmoi mbështetjen për strukturat e drejtësisë, duke theksuar se data 11 maj do të shërbejë si votë kundër atyre që synojnë shkrirjen e SPAK-ut.
Në të njëjtën kohë, Rama dha një mesazh të qartë për zyrtarët e akuzuar për korrupsion:
“Njësoj si ju që kujdeseni për pastrimin e shtëpisë, edhe ne do pastrojmë shtëpinë tonë dhe do ta bëjmë vendin që kushdo që ha të tjerët pas shpine të largohet e të shkojë aty ku e meriton.”
Ai nënvizoi se reforma në drejtësi është një arritje unike në rajon:
“Nuk ka ndodhur ndonjëherë më parë që nga 1912 që cilido i lidhur me pushtetin politik të shkojë përpara një prokurori dhe gjykate të pavarur. PS-ja realizoi një reformë që nuk e ka bërë asnjë vend tjetër në rajon. Kur morëm detyrën, ishim të fundit në trenin e anëtarësimit në BE. Tani jemi lokomotiva e gjithë rajonit.”
Kryeministri theksoi se shpatën e ndëshkimit, që më parë mbahej nga qeveria, tani e mban drejtësia:
“Kush ka hyrë në procese hetimore më parë, ka hyrë me urdhër nga lart. Sot ndodh sepse ne dorëzuam te drejtësia shpatën e ndëshkimit.”
Lidhur me deklaratat për shkrirjen e SPAK-ut, Rama ironizoi:
“Kjo nuk varet nga ndonjë buf kënete që thotë se do shkrijë SPAK-un apo ndonjë specie tjetër që përbetohet për të njëjtën gjë. Kur të jemi në BE, kjo nuk ndodh.”
Ai shtoi se anëtarësimi në Bashkimin Europian është thelbësor për të garantuar standardet e bashkëjetesës dhe përfitimet ekonomike:
“BE ka dy kategori: kontribuesit dhe përfituesit. Ne jemi përfitues, sepse kemi më shumë nevojë.”
Në fund, Rama i bëri thirrje grave dhe vajzave të jenë krenare për progresin në luftën kundër korrupsionit, duke e mbyllur me një tjetër mesazh:
“Njësoj si ju që pastroni shtëpinë, edhe ne do ta pastrojmë vendin nga ata që nuk e meritojnë të jenë pjesë e tij.”
