Nga dyert e SPAK, Sali Berisha konfirmoi se Ilir Meta do të jetë kandidat për deputet per zgjedhjet parlamentare të 11 majit në listat e sigurta të Partisë Demokratike. "Ai donte të ishte në listat e hapura. Por e mbajnë në burg të mos dalë në fushatë", tha Berisha. Në këtë mënyrë konfirmoi se aleati i tij kryesor ka gjasë te zgjidhet deputet, teksa ndodhet në paraburgim.
Ish-kryeministri që mbërriti në SPAK në zbatim të vendimit të gjykatës paralajmëroi Edi Ramën se nëse vjen në pushtet do të kërkojë ekstradimin e tij drejt SHBA-ve për tu hetuar e gjykuar për dosjen McGonigal.
Sipas Berishës, McGonigal nuk ndodhej në SPAK por në kryeministri ku sipas tij po bën pazaret e fundit.
"McGonigal kishte shkuar në kryeministri, erdhi këtu mori dosjet dhe shkoi te Rama dhe atje po bën pazaret e fundit. Mund t’u them këtu se pas 11 majit do të ekstradohet menjëherë SHBA. Për derisa sa këta këtu nuk guxojnë t’i japin atë që meriton atëherë qeveria shqiptare do bëjë kërkesë për ekstradimin e tij në Amerikë", tha Berisha.
Ish-kryeministri ndërkohë nuk kurseu akuzat ndaj prokurorëve të SPAK dhe tha se është i vendosur ta reformojë prokurorinë politike.
