Ish-kryeministri Sali Berisha ka zbatuar masën e sigurisë “detyrim paraqitje” në SPAK, vendosur nga GJKKO në kuadër të hetimeve për çështjen “Partizani”. Në një prononcim për mediat pas daljes nga Prokuroria e Posaçme, Berisha deklaroi se deputeti socialist, Etjen Xhafaj, është bërë “kurban” i një marrëveshjeje mes kryeministrit Edi Rama dhe kreut të SPAK, Altin Dumani.
Sipas tij, Xhafaj u ndëshkua pasi theu këtë marrëveshje duke kritikuar SPAK-un pa lejen e Ramës.
“Aty gjeta ish-xhelatin e Sigurimit të Shtetit, Arben Kraja, duke pirë kafe me Benet Becin. Etjenin e gjeta kurban të marrëveshjes Rama-Dumani. Ai e shkeli marrëveshjen sipas së cilës nuk mund të sulmohet SPAK pa autorizimin e Edi Ramës,” tha Berisha.
Ai akuzoi gjithashtu mazhorancën për ndalimin e hetimeve ndaj zyrtarëve të lartë dhe për përpjekjet për të përfshirë opozitën në këtë proces.
“Etjeni kishte mbetur aty, nuk dilte dot nga SPAK-u,” përfundoi Berisha.
