Kreu i Partisë Demokratike, Sali Berisha, ka deklaruar se në 12 vitet e fundit bujqësia shqiptare ka pësuar një rënie të madhe, duke fajësuar qeverinë për situatën e krijuar.
Sipas tij, firmosja e marrëveshjes së Ballkanit të Hapur ka çuar në falimentimin e mijëra fermave dhe uljen dramatike të prodhimit bujqësor e blegtoral.
“Made in Albania kërkon një bujqësi të zhvilluar dhe fermerë të suksesshëm. Me firmosjen e Ballkanit të Hapur mijëra ferma kanë falimentuar. Programi ynë bazohet në rritjen e madhe të prodhimit dhe mbështetjen e fermerëve,” tha Berisha.
Ai paralajmëroi se pas 11 majit qeveria e koalicionit PD-ASHM do të ndërmarrë masa konkrete për të mbështetur sektorin bujqësor, përfshirë: Subvencionim për çdo njësi prodhimi, bagëti dhe fidanë të mbjellë dhe dalje e menjëhershme e Shqipërisë nga Ballkani i Hapur dhe zbatimi i Procesit të Berlinit
Berisha: Rama jeton në një realitet me hardhuca dhe bretkosa
Kreu i PD-së u shpreh gjithashtu se kryeministri Edi Rama është i shkëputur nga realiteti dhe ka ndërprerë çdo komunikim me qytetarët.
“Sot ai jeton në një realitet me hardhuca e bretkosa me Lul Bravën. Popullin e ka shumëzuar me zero dhe nuk i intereson për pensionistët,” deklaroi Berisha.
Ai akuzoi qeverinë për dështime në ekonomi dhe për mungesën e mbështetjes ndaj qytetarëve, ndërsa theksoi se ndryshimi do të vijë pas 11 majit.
