I pyetur nga gazetarët se pse ende nuk është publikuar kontrata me LaCivita, kreu i Partisë Demokratike, Sali Berisha, deklaroi se kontrata me drejtuesin e fushatës së PD-së do të bëhet publike sipas parashikimeve ligjore. Në një konferencë për shtyp, ai theksoi se do të ketë transparencë të plotë mbi çdo qindarkë të paguar dhe burimin e financimit.
“Ju garantoj se ajo kontratë, me të gjitha burimet se ku është marrë çdo qindarkë, do bëhet publike ditën që do përmbushet detyrimi ligjor i dorëzimit të saj në KQZ, siç na detyron ligji”, u shpreh Berisha.
Gjatë fjalës së tij, kreu i PD-së kritikoi kryeministrin Edi Rama për komunikimin e tij në rrjetet sociale, duke e akuzuar se shpik pyetje dhe u përgjigjet vetë për të manipuluar publikun.
“Unë, natyrisht, nuk bëj Edi Ramën që flet me vete, që shpik edhe fansat dhe i bën pyetje vetes duke mashtruar publikun”, tha Berisha.
Ndër të tjera, ai akuzoi Ramën për lidhje me çështjen “McGonigal” dhe për abuzime me fondet publike. Berisha theksoi se po të mos ishte drejtuesi i SPAK-ut, Altin Dumani, Rama dhe zyrtarë të tjerë të qeverisë do të duhej të ishin përballë drejtësisë.
“Ai duhet të bëjë nga mëngjesi deri në darkë lavde, elozhe dhe t’i lëpihet Altin Dumanit, sepse qëndron aty pikërisht sepse Dumani është bërë mburojë e këtyre vjedhjeve dhe krimeve”, tha ai.
Akuzat ndaj Belinda Ballukut dhe Erion Veliajt
Berisha akuzoi ministren e Infrastrukturës, Belinda Balluku, për një aferë financiare prej 12 miliardë eurosh, duke pretenduar se investimet reale nuk justifikojnë shumat e mëdha të përdorura.
“Veliaj ka përdorur gjithsej 5-6 miliardë euro, Lubia 12 miliardë euro, ku janë? Investimi i tyre qindarkë për qindarkë nuk shkon më shumë se 1.3 miliardë euro, të tjerat janë vjedhur”, u shpreh ai.
Berisha theksoi se drejtësia duhet të veprojë ndaj këtyre zyrtarëve, duke përmendur edhe çështjen e inceneratorëve.
“Po të mos ishte Altin Dumani, Edi Rama do të ishte aty ku e meriton”, tha kreu i PD-së, duke theksuar se SPAK nuk po vepron ndaj figurave kryesore të qeverisë.
