Kryeministri Edi Rama ka sulmuar opozitën, duke e akuzuar se kërkon të shkrijë Prokurorinë e Posaçme (SPAK). Gjatë rubrikës së tij “Sy m’sy”, Rama theksoi se drejtësia e re duhet të garantohet përtej vullnetit politik dhe bëri thirrje për një mbështetje masive më 11 maj.
“Ia kemi dorëzuar shpatën drejtësisë, ndaj sot ka edhe një lëvizje në hetimin dhe ndëshkimin e personave të lidhur me pushtetin politik. Kjo nuk mund të jetë në dorë të një partie politike dhe vullnetit të një lidershipi, sepse nesër vjen dikush tjetër e kthen përmbys. Na duhet BE,” tha Rama.
Kreu i qeverisë u shpreh se opozita synon të pengojë reformën në drejtësi dhe se vota e 11 majit duhet të jetë një përgjigje e qartë ndaj tyre.
“Ata që çdo ditë thërrasin ‘burgu, burgu’ janë penguesit e reformës në drejtësi. E morën peng dikur dhe kërcënuan me bojkot të zgjedhjeve. Sot thonë hapur se duan të shkrijnë SPAK. Prandaj, më 11 maj duhet të krijojmë një vetëdije të re përtej të majtës dhe të djathtës. Ishte Luli në krye por Luli ishte kukulla e bufit të kënetës, ndërsa bufi e thotë shumë qartë sot se me votën e 11 majit do të shkrijë SPAK. Ky është kërcënimi real që është sot por mund të jetë edhe më vonë nëse nuk hyjmë në BE.
Në momentin që hyjmë e bëhemi pjesë e BE, është pa diskutim e vetmja rrugë e jonë, kurorëzimi i një historie të gjatë luftërash poshtërimesh, rrëzimesh që kemi në dorë në 11 maj që ta realizojmë”, tha ai.
Ai ftoi qytetarët të votojnë për Partinë Socialiste, duke e cilësuar këtë si një domosdoshmëri për procesin e integrimit.
