Nuk është fantazi, por e vërtetë. Në një kohë kur fushata zgjedhore ka nisur në Shqipëri, edhe pse jo zyrtarisht, partitë politike kanë firmosur sot Kodin e Etikës.
Nënshkruesit mbështesin parimet themelore të zgjedhjeve demokratike, si integriteti, transparenca, privatësia, siguria, drejtësia dhe kushtet e barabarta të lojës.
Njësoj si në parlament, kur në seancë shahen dhe rrihen, edhe në fushatë përdorin çdo mjet për të sulmuar kundërshtarin: sharje, fyerje, epitete dhe bullizime. Ama, kur vjen puna për t’u dukur bashkë bukur në një foto… pozojnë si pellumba. Duke lënë mënjanë bufat, fjalorin banal, fyerjet personale dhe gjithë bagazhin amoral të një fushate që veç për një jetë foto të shtirur nuk ka nevojë.
Njësoj si në parlament, kur mbaron seanca dhe ulen në kafe, edhe këtu, në krah të Celibashit dhe disa të huajve, drejtuesit e partive që marrin pjesë në zgjedhje shfaqen të qeshur dhe bashkëpunues, a thua se gjithçka po shkon fjollë. Do të kalojnë vetëm pak orë që të gjithë në këtë foto të dalin e të shajnë njëri-tjetrin në mënyrë të paskrupullt, shumë herë pa fakte dhe pa argumenta, por thjesht për qëllime elektorale. Sepse në këtë vend politika është një sjellje e shtirur dhe përdoret për interesa banale. Përndryshe, ajo që duket në këtë foto duhet të reflektohet dhe në sjelljen e përditshme të drejtuesve të partive që marrin pjesë në zgjedhjet e 11 majit.
