Ish-zëvendëskryeministrja Belinda Balluku ka qëndruar vetëm rreth 20 minuta në ambientet e Prokurorisë së Posaçme, ku u paraqit këtë të premte në kuadër të hetimeve që po zhvillohen ndaj saj.
Pas daljes nga SPAK, Balluku nuk dha asnjë deklaratë për gazetarët që ndodheshin jashtë godinës.
Prokurorët e Posaçëm e kanë marrë Ballukun të pandehur edhe për lotet e Unazës së Madhe, ndërsa më herët ajo ishte marrë e pandehur për tenderin e ndërtimit të tunelit të Llogarasë.
Ndaj ish-zëvendëskryeministres dhe ish-ministres së Infrastrukturës vijojnë ndërkohë hetimet edhe për veprat penale të korrupsionit dhe pastrimit të parave.
Këtë të premte, Ballukut pritej t’i komunikohej gjithashtu zgjatja e afatit të hetimeve deri më 20 tetor.
Përpara mbërritjes së Ballukut në SPAK, në ambientet e Prokurorisë së Posaçme ishte paraqitur edhe Ardian Kalia, avokati i saj.
Në një reagim për mediat, Prokuroria e Posaçme konfirmoi se Belinda Balluku është thirrur për t’u njohur me akuzën që lidhet me disa procedura prokurimi nën hetim, për t’u pyetur mbi akuzat dhe për t’iu komunikuar akte të tjera procedurale.
