Ambasada e Shteteve të Bashkuara në Jordani u ka bërë thirrje qytetarëve amerikanë që ndodhen në Lindjen e Mesme të marrin në konsideratë largimin nga rajoni në rast se situata e sigurisë përkeqësohet.
Në një njoftim të publikuar në platformën X, ambasada u kërkoi amerikanëve të tregojnë vigjilencë të shtuar dhe të jenë të përgatitur për anulime fluturimesh, mbyllje të përkohshme të hapësirës ajrore dhe ndërprerje të mundshme të udhëtimeve.
Po ashtu, qytetarëve amerikanë që ndodhen jashtë Lindjes së Mesme iu rekomandua të rishqyrtojnë me seriozitet çdo udhëtim drejt ose përmes rajonit.
Sipas ambasadës, situata mbetet dinamike dhe ekziston rreziku që Irani ose grupet e mbështetura prej tij të ndërmarrin sulme ndaj interesave amerikane jashtë territorit të SHBA-së.
Ambasada Amerikane në Aman u bëri gjithashtu thirrje shtetasve amerikanë të shmangin udhëtimet drejt bazave ushtarake në Jordani, ndërsa i këshilloi të ndjekin njoftimet zyrtare dhe udhëzimet e autoriteteve jordaneze.
Ky paralajmërim vjen në një kohë tensionesh të larta mes Shteteve të Bashkuara dhe Iranit. Sipas një raportimi të CBS News, që citon zyrtarë amerikanë, Uashingtoni po shqyrton mundësinë e ndërmarrjes së sulmeve të reja ndaj Iranit gjatë kësaj fundjave.
