Hamasi ka bërë të ditur se ka pranuar një marrëveshje me shkrim për fazën e dytë të armëpushimit në Rripin e Gazës, por ka vendosur si kusht që Izraeli të zbatojë plotësisht detyrimet e fazës së parë përpara se marrëveshja të hyjë në fuqi.
Lajmi u konfirmua nga zyrtari i lartë i Hamasit, Ghazi Hamad, i cili deklaroi për Anadolu se grupi ka miratuar një "paketë gjithëpërfshirëse" angazhimesh reciproke dhe të njëkohshme.
Sipas Hamad, marrëveshja përfshin tërheqjen graduale dhe më pas të plotë të forcave izraelite nga Gaza, rindërtimin e enklavës, vendosjen e forcave ndërkombëtare, kalimin e administrimit te Komiteti Kombëtar për Administrimin e Gazës, si edhe dispozita për armët.
"Nëse Izraeli nuk i zbaton detyrimet e tij sipas marrëveshjes, as ne nuk do t'i zbatojmë tonat", deklaroi ai.
Hamad sqaroi se armët e rënda do të kalojnë nën përgjegjësinë e Komitetit Kombëtar për Administrimin e Gazës, ndërsa një komitet ndërkombëtar mbikëqyrës do të monitorojë zbatimin e marrëveshjes.
Ai bëri të ditur gjithashtu se Hamasi do të marrë pjesë në një raund të ri bisedimesh në ditët në vijim me ndërmjetësuesit, përfaqësues të SHBA-së dhe diplomatë ndërkombëtarë për të finalizuar mekanizmat dhe afatet e zbatimit.
Megjithatë, Hamad theksoi se Izraeli ende nuk e ka shpallur zyrtarisht miratimin e marrëveshjes.
Sipas tij, marrëveshja është "e dhimbshme dhe e vështirë" për Hamasin, por është pranuar për shkak të situatës humanitare në Gaza dhe për të shmangur shkatërrime të mëtejshme.
