Kryetari i Partisë Demokratike, Sali Berisha, gjatë prezantimit të programit për pronat, është përballur me revoltën e dy ish-pronarëve për situatën ku ndodhen pas 34 vitesh demokraci.
Në përfundim të diskutimeve të ekspertëve krah Berishës, një përfaqësues i shoqatës të “Pronarëve Legjitim”, mori fjalën dhe nisi të numërojë premtimet e pambajtura të Berishës përgjatë më shumë se 34 viteve, pikërisht në lidhje me problemin e pronave.
"Edhe unë jam mosha juaj afërsisht dhe kam 34 vjet që po duroj. Kur do realizohet kjo? Kur të merrni pushtetin? Pastaj do harrohet! E di unë atë muhabet. Siç u harrua në 2005-2013. Siç do harrohet në 2025 po e morët. Sa të hipim në kalë dhe pastaj të bëjmë si të duam!" – tha ai.
Ai më tej rrezoi të gjithë deklaratën e Berishës për ligjin 7501 që tha se ishte i diktuar nga psikologjia antipronë në atë kohë. Ish-pronari tha se në vitin 1991, PD me në krye Sali Berisha ndryshuan draftin e ligjit 7501 nga “Përdorim” në “Pronësi” duke sjell këtë lëmsh me pronat në Shqipëri.
“PD, se unë jam vet i PD që kur kam lindur, sa herë ka nevojë na thërret, kur merr pushtetin na harron. Dhe këtë meritë dhe përgjegjësi e ka PD, në vitin 91. Në 91-in është bërë dava 3 ditë rresht vetëm për një fjalë deri në 12 të natës, “Pronësi” apo “Përdorim”, 7501. Drafti e ka pasur përdorim 10-15 vite, PD me në krye zotin Berisha, deshën Pronësi, për të bërë kapitalistat e rinj në Shqipëri. Hajde ndryshoje tani atë” – u shpreh përfaqësuesi i shoqatës të “Pronarëve Legjitim”.
