Kreu i Partisë Demokratike, Sali Berisha, ka komentuar thirrjen e kryeministrit Edi Rama ndaj deputetit demokrat Dashnor Sula për t’iu bashkuar Partisë Socialiste. Sipas Berishës, vendi i Sulës është në Partinë Demokratike dhe tentativa e tij për t’u afruar me Llapajn ishte një gabim.
“Dashnor Sula është eksponent i PD me investime reale në këtë parti, vendi i tij është në PD. Njeri të pagabueshëm nuk ka, ideja e tij për të gjetur strehë tek Llapaj e mori përgjigjen sot nga Rama. Rama i thotë atij që ‘sa shkoj te Llapaj hajde tek unë, se është njësoj se jam unë padroni’,” tha Berisha.
Ai theksoi se ky qëndrim i Ramës tregon qartë se përzgjedhja e Sulës për të bashkëpunuar me Llapajn ishte e gabuar. “Në këto deklarata shihet se sa e gabuar ishte përzgjedhja që bëri Dashi me Llapajn, ata janë njëlloj, janë paterica të Ramës,” u shpreh ai.
Sali Berisha ka komentuar edhe veprimin e deputetit demokrat Flamur Noka, i cili tregoi gishtin e mesit gjatë një seance plenare, duke e cilësuar si një akt ironik.
“Flamuri mund të mos e bënte atë gjest, por Flamuri e njeh se gjuha e tyre është gjithnjë afrodiziake. Ai e di që ata kuptojnë më mirë se çdo gjuhë tjetër, gjuhën afrodiziake. Kështu e interpretova unë atë,” deklaroi Berisha.
