Bashkimi Europian ka prezantuar një plan ambicioz për të forcuar kapacitetet e tij mbrojtëse, duke synuar mobilizimin e deri në 800 miliardë euro gjatë katër viteve të ardhshme.
Kjo iniciativë, e njohur si "ReArm Europe", u propozua nga Presidentja e Komisionit Evropian, Ursula von der Leyen, më 4 mars 2025, në përgjigje të sfidave gjeopolitike aktuale dhe nevojës për të rritur autonominë strategjike të Evropës.
Por teksa Europa armatoset, Shqipëria vijon të krenohet me bazat e vjetra ushtarake. Sot, Kryeministri Edi Rama vizitoi Bazën Ajrore të Kuçovës, i shoqëruar nga ministri i Mbrojtjes, Pirro Vengu, për të verifikuar përparimet e fazës së dytë të zhvillimit të bazës, e cila ka mbështetje të fortë nga NATO.
Në këtë fazë, po kryhen punime të reja për ndërtimin e objekteve, fortifikimin e depove të municioneve për raketa dhe bomba drejtuese, si dhe integrimi i dronëve kamikazë sipas marrëveshjes me Turqinë.
Në anën tjetër, përfundimi i qendrës stërvitore për operimin e dronëve Bajraktarë tregon për avancimin e proceseve, ndërsa 80% e flotës së helikopterëve është rikthyer në funksion të plotë, me disa mjete ende në fazë riparimi.
Plani përfshin gjithashtu vendosjen e kullës së pilotimit në Vlorë dhe përgatitjen e infrastrukturës për të pritur trajnime të pilotëve dhe stafit teknik nga vendet aleate të NATO-s, duke përfshirë akomodimin e personelit dhe familjarëve përmes rehabilitimit të ish-Shtëpisë së Oficerëve në Kuçovë.
