Ish-ylli i futbollit brazilian, Ronaldinho, është në qendër të raportimeve për një rikthim të pazakontë në fushën e lojës, këtë herë në Itali, me klubin e Ravenës, që garon në Serie C.
Sipas mediave italiane, ish-futbollisti i Barcelonës mund të rikthehet për një paraqitje të veçantë më 15 nëntor, në ndeshjen kundër Forlit. Ideja lidhet me synimin për të shënuar golin e 300-të të karrierës së tij, pasi gjatë periudhës 1998-2015 ai regjistroi 299 gola, 266 me klubet ku u aktivizua dhe 33 me kombëtaren e Brazilit.
Megjithatë, lajmi ka shkaktuar reagime të ndryshme mes tifozëve të Ravennës. Një pjesë e tyre mendojnë se një ndeshje kaq e rëndësishme, në një moment kur skuadra synon të luftojë për kreun e Serie C, nuk është vendi i përshtatshëm për një paraqitje simbolike.
Në rrjetet sociale nuk kanë munguar komentet ironike. Disa tifozë kanë bërë shaka se Ronaldinho mund të përfitojë nga një penallti e diskutueshme për të shënuar golin e shumëpritur dhe më pas të largohet nga loja. Të tjerë kanë ironizuar stilin e jetesës së brazilianit pas largimit nga futbolli profesionist.
Pavarësisht kritikave, emri i Ronaldinhos po i sjell vëmendje klubit italian. Në bashkëpunim me kompaninë Panini, Ravena ka prezantuar një koleksion të veçantë figurash kushtuar kësaj nisme.
Sipas informacionit të publikuar për koleksionin, figura prej bronzi shpërblehet me një kapelë të klubit, ndërsa ajo prej argjendi me një fanellë të firmosur nga Ronaldinho. Çmimi kryesor është rezervuar për personin që gjen figurën e artë, i cili do të përfitojë një biletë për ndeshjen dhe mundësinë për t’u takuar personalisht me legjendën braziliane.
