Kryeministri Edi Rama ka deklaruar se anëtarësimi i Shqipërisë në Bashkimin Europian është një mundësi historike që duhet shfrytëzuar, duke theksuar se pasaporta europiane do t’i japë fund trajtimit të shqiptarëve si qytetarë të dorës së dytë.
Rama tha se integrimi në BE është i lidhur me qeverisjen e Partisë Socialiste dhe paralajmëroi se nëse kjo mundësi nuk shfrytëzohet tani, mund të humbet për shumë vite.
“Jo që nuk jemi të paaftë, por përkundrazi, ose e fus unë dhe PS Shqipërinë në BE me mandatin e katërt, ose kjo punë mund të mos bëhet për kush e di sa vite të tjera. Kur morëm detyrën, Shqipërinë nuk ia hidhte njeri sytë. Shikoni vetëm turizmin, bukuritë e natyrës ishin gjithmonë aty, por ne i dhamë zhvillim,” u shpreh ai.
Rama theksoi se kjo çështje është më e madhe se politika dhe se shqiptarët duhet të mendojnë për të ardhmen e brezave të rinj.
“Bëhet fjalë që fëmijëve të këtij vendi t’u japim pasaportën e BE, jo TikTok-un. Është një moment historik, treni i historisë ka ndaluar para nesh dhe duhet ta kapim. Kush e kap, ecën përpara, kush fle, e humbet këtë tren,” tha kryeministri.
Gjatë një replike me një qytetar në rubrikën “Sy m’Sy”, Rama iu përgjigj kritikave për gjendjen ekonomike të shqiptarëve, duke kundërshtuar pretendimet se njerëzit nuk kanë bukë të hanë.
“Për cilët e ke fjalën që nuk kanë bukë të hanë në darkë? Për kë konkretisht? Në Shqipëri ka patjetër një numër shumë të vogël, por historia e bukës për drekë dhe për darkë ka shumë vite që është mbyllur. Në Shqipëri për bukë nuk ka vdekur njeri që nga koha e Skënderbeut, ke dëgjuar njeri ti të vdesë nga uria?” tha Rama.
Ai theksoi se ndonëse sfidat ekonomike ekzistojnë, vendi ka bërë përparime dhe duhet të fokusohet tek zhvillimi dhe integrimi europian.
